မြို့ပြနေ့များ

ပင့်ကူအိမ်လို ရှုပ်ထွေးနေတဲ့လမ်းတွေ
ဆူညံသံတွေနဲ့ ညစ်ညမ်းလှတဲ့ လောင်စာဆီသုံး ယာဉ်တွေကြား
ငါ့ဘဝဟာ မိုးတိုးမတ်တပ်
ဒေါင်လိုက်ကြီးပျော်ဝင်နေခဲ့ရပေါ့………….

အထပ်ထပ်ဘဝနဲ့
ကိုယ်ဒူးတောင် ကိုယ်မယုံရဲ
အဆင်းနဲ့အတက်ဆိုတာ
ဝဋ်ဆင်းရဲတစ်ခုပါပဲ……….

ဘယ်သွားသွား
ပိုက်ဆံပေးပြီး အဆဲခံရတယ်
နဖူးကချွေးခြေမကျမှ လိုရာခရီးရောက်တယ်
ဘဝကအညိုရောင်သန်းနေပါပြီ……..

ရှော့ပင်းစင်တာတွေရှိတယ်
ရပ်ကြည့်မယ့်သူပေါတယ်
လမ်းလျှောက်တဲ့သူများတယ်
အိပ်မက်တွေကို လျှော့ဈေးနဲ့ရောင်းတယ်
ငါလည်းကိုယ့်ဘဝကို ဈေးကွက်တင်ကြည့်ဖို့
ဆိုင်ခန်းတစ်ခုလောက်လိုချင်တယ်
ကွန်ဒိုတစ်ခုခုမှာပေါ့…………